Pikërisht, jetëgjatësia është arsyeja e ekspeditës së fundit të Dr. Rosen Gacin në Bullgarinë Veriperëndimore. Georgi Pellovski, Diana Pellovska, Gergana Nikollova, Jonço Pellovski, Georgi Dimitrov mësuan për veprimtarinë e studiuesit dhe ekspozitën e ardhshme nga Radioja Kombëtare Bullgare dhe e kontaktuan atë për t'i treguar për paraardhësin e tyre Jonço Collov.

“Rasti solli një takim me trashëgimtarët e një fisi të vjetër nga Bullgaria Veriperëndimore, të cilët erdhën tek unë dhe më thanë se në familjen e tyre ka pasur një person që ka jetuar 130 vjet. Unë e mora si legjendë dhe përrallë. Por rezultoi se në fakt në fshatin Lik të bashkisë Mezdra, Rajoni i Vracës ka një rast të tillë. Ne gjetëm një certifikatë vdekjeje në bashki të një burri që ka jetuar 130 vjet. Ai kishte lindur në vitin 1777 dhe ishte ndarë nga jeta më 9 janar 1907. Tani kushdo mund të thotë që ne nuk kemi një certifikatë lindjeje, por nuk ka sesi të ketë një certifikatë lindjeje në atë periudhë sepse po flasim për fundin e shekullit të 18-të. Por duke gjurmuar kronologjikisht lindjet e fëmijëve të njëqindvjeçarit, shohim dhe jemi të sigurt se ky person ka lindur pikërisht në vitin 1777”.

Pasuan takime dhe biseda me banorë vendas dhe të afërm, të cilat çuan në zbulimin e gurit të varrit të vetë Jonços, mbi të cilin duket qartë edhe sot mbishkrimi: "Këtu prehet babai Jonço 130 vjeç, djali Ivan 103 vjeç, djali Krëstjo 106 vjeç. Babai i tyre vdiq në vitin 1906. Ndërtuar nga Geno Krëstev"

Nga kjo duket qartë se gjyshi Jonço ka jetuar më shumë se të dy djemtë e tij - njëqindvjeçar dhe ka vdekur nga një sëmundje, shpjegon doktor Gacin.

Zbulimi se Jonço Collov ka jetuar 130 vite është gati të vërtetohet si një rekord botëror, thotë Dr. Rosen Gacin. Duhet të jemi krenarë që në trojet tona kanë jetuar njerëz të moshës biblike, theksoi shkencëtari bullgar.

"Ne së shpejti do të tregojmë historinë e këtij njëqindvjeçari, sepse kjo është një moshë vërtet e mahnitshme. Historia e tij do të jetë në qendër të vëmendjes në ekspozitë. Në të do të bëhet një kënd i veçantë, në të cilin do të tregohet historia e njëqindvjeçarit, e familjes së tij, do të prezantohen foto, dokumente që vërtetojnë vërtet moshën dhe jetën e tij, ndaj do të jetë interesante për të gjithë të vizitojnë dhe të shohin se çfarë lloj njerëzish kanë jetuar në trojet tona”, thotë Dr. Gacin.

Por cili është sekreti i jetëgjatësisë? Askush nuk e di ende. Ndoshta është një kombinim i shumë komponentëve të jetës – natyra e pastër, aktiviteti fizik, ushqimi i shëndetshëm, një jetë paqësore dhe njerëzit e mirë rreth teje, beson shkencëtari. Por cili ishte sekreti i Jonço Collovit, mbase do ta zbulojmë në nëntor nga ekspozita "Kodet e identitetit".