88 vjet pas transmetimeve të para të radios bullgare jashtë vendit dhe 87 vjet pas hyrjes masive të programeve në gjuhë të huaj në median e parë elektronike në vendin tonë, edhe sot ekipi i Radio Bullgarisë vazhdon misionin e tij për ndërtimin e urave midis njerëzve në mbarë botën dhe për përhapjen e njohurive për Bullgarinë në të gjitha kontinentet.

Mjetet moderne të shprehjes dhe "revolucioni digjital" bëjnë të mundur arritjen e një auditori më të gjerë dhe më të larmishëm, dhe dy-tre vitet e fundit na kanë dhënë mundësinë të kapërcejmë disa stereotipa të imponuara padrejtësisht nga koha.

Sot Radio Bullgaria krijon përmbajtje gazetareske për platforma të ndryshme mediatike, duke përfshirë - transmetime për bullgarët jashtë vendit, transmetime për të huajt në Bullgari dhe më gjerë, transmetime radiofonike për shtetasit bullgarë, gjuha amtare e të cilëve është e ndryshme nga bullgarishtja. Ne jemi të pranishëm në rrjetet sociale në të 11 gjuhët tona dhe komunikojmë me dëgjuesit tanë si përmes kanaleve tradicionale ashtu edhe të reja të komunikimit.

Pavarësisht sfidave të ditëve tona, me punë dhe këmbëngulje në tri vitet e fundit ia dolëm:

• Të rifillojmë transmetimet e përditshme radiofonike në gjuhën bullgare, të destinuara për bashkatdhetarët tanë jashtë vendit (2022);

• Të fillojmë një projekti të ri për një prezantim më të thellë të komuniteteve bullgare jashtë vendit dhe për krijimin e kontakteve të përhershme me ta (2023);

• Të realizojmë, në kuadër të Programit Kombëtar për përkujtimin e 150-vjetorit të vdekjes së Apostullit të Lirisë, një sërë nismash të përbashkëta me shkollat ​​bullgare jashtë vendit, të cilat mbajnë emrin e Vasill Levski (2023);

• Të rifillojmë transmetimet tona në nëntë gjuhë të huaja, që tingëllojnë çdo ditë me emrin "Bullgaria Sot" (2021);

• Të shtojmë një gjuhë tjetër në të cilën komunikojmë me botën - rumanishten, dhe me këtë BNR të sigurojë mbulim të plotë informacioni gjuhësor për të gjithë fqinjët ballkanikë të vendit tonë (2022);

• Të rifillojmë pas një pauze 40-vjeçare regjistrimet e veprave muzikore, pjesë e pasurisë së të kënduarit të turqve bullgarë (2022-2023);

• Të realizojmë një sërë transmetimesh radiofonike të jashtme nga rajoni i Karxhalit dhe Ludogorie (2021-2023);

• Të fitojmë Çmimin e Madh "Sirak Skitnik 2021" për kontributin tonë në zhvillimin e BNR (2022);

• Të marrim fletën e nderit të Lidhjes së Shkrimtarëve Bullgarë për punë në mbështetje të letërsisë moderne bullgare (2023);  

Dhe me shume…

Dhe gjëja më e rëndësishme për ne është mbështetja juaj, të dashur dëgjues të Radio Bullgarisë, në eter dhe në hapësirën e internetit! Faleminderit!

Dhe... vazhdojmë!

Përgatiti në shqip dhe publikoi: Svetllana Dimitrova